ຈໍານວນຜູ້ເຂົ້າຊົມເວັບໄຊ

126428
ມື້ນີ້ມື້ນີ້108
ມື້ວານນີ້ມື້ວານນີ້319
ອາທິດນີ້ອາທິດນີ້1173
ເດືອນນີ້ເດືອນນີ້4782
ລວມທັງໝົດລວມທັງໝົດ126428

ມີ 5  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ເຂົ້າສູ່ລະບົບ

ໂຄງການກໍ່ສ້າງຂົວຂ້າມແມ່ນໍ້າແມດ ຕັ້ງຢູ່ລະຫວ່າງກາງຂອງບ້ານ ທ່າ ແລະ ບ້ານ ໂພນໂຮມ ເມືອງ ໄຊຍະບູລີ ແຂວງ ໄຊຍະບູລີ, ຫ່າງຈາກເທດສະບານເມືອງ ໄປທາງທິດຕາເວັນຕົກ 25 ກິໂລແມັດ, ໂຄງການດັ່ງກ່າວໄດ້ຮັບທຶນອານຸມັດການລົງທຶນຂອງລັດ ສົກ 2017-2018 ເປັນທຶນພັດທະນາຂອງຊົນນະບົດ, ເຊິ່ງເລີ່ມລົງມືກໍ່ສ້າງແຕ່ວັນທີ 27 ມີນາ 2017 ຮອດປະຈຸບັນແມ່ນສຳເລັດ 100 %, ຂົວດັ່ງກ່າວມີຄວາມຍາວ 30,45 ແມັດ, ກ້ວາງ 3,5 ແມັດ, ໂຄງສ້າງເບື້ອງລຸ່ມເປັນເສົາເບຕົງເສີມເຫຼັກ, ໂຄງສ້າງເບື້ອງເທີງເປັນຂົວເຫຼັກຮາວດຽວ, ສາມາດຮັບນໍ້າໜັກໄດ້ 7 ໂຕນ, ມູນຄ່າການກໍ່ສ້າງທັງໝົດ 3 ຕື້ 2 ຮ້ອຍລ້ານ ກວ່າກີບ, ໃນນັ້ນທຶນສົມທົບຂອງປະຊາຊົນ 1 ຮ້ອຍລ້ານ ກວ່າກີບ, ໂດຍແມ່ນບໍລິສັດ ອຸທຸມພອນ ກໍ່ສ້າງຂົວທາງ ເປັນຜູ້ຮັບເໝົາກໍ່ສ້າງ.

ພິທີມອບ-ຮັບ ແລະ ເປີດນຳໃຊ້ຂົວຢ່າງເປັນທາງການ ໄດ້ຈັດຂຶ້ນໃນວັນທີ 15 ກໍລະກົດ 2018 ທີ່ບ້ານ ໂພນໂຮມ ເມືອງ ໄຊຍະບູລີ, ໂດຍການເຂົ້າຮ່ວມຂອງທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ , ມີທ່ານ ຄຳສິງສໍລະສຸກ ເຈົ້າເມືອງ ໄຊຍະບູລີ, ມີບັນດາແຂກພາກສ່ວນທີ່ກ່ຽວຂ້ອງອ້ອມຂ້າງແຂວງ ແລະ ເມືອງ ໄຊຍະບູລີ, ຕະຫຼອດເຖິງປະຊາຊົນພາຍໃນ

ສອງບ້ານເຂົ້າຮ່ວມຢ່າງຫຼວງຫຼາຍ, ໃນພິທີກໍ່ໄດ້ມີການມອບຮັບຂົວ ລະຫວ່າງບໍລິສັດຜູ້ຮັບເໝົາກໍ່ສ້າງໂດຍແມ່ນ ທ່ານ ຄຳຂ່ອງ ແກ້ວມະນີ ຕາງໜ້າໃຫ້ບໍລິສັດ ອຸທຸມພອນກໍ່ສ້າງຂົວທາງ, ເຈົ້າຂອງໂຄງການໂດຍແມ່ນ ທ່ານ ສີສຸກ ສີພານິດ ຫົວໜ້າຫ້ອງການ ໂຍທາ ເມືອງ ໄຊຍະບູລີ ແລະ ມອບຕໍ່ໃຫ້ອຳນາດການປົກຄອງສອງບ້ານ

ເປັນຜູ້ຄຸ້ມຄອງປົກປັກຮັກສາ ແລະ ນຳໃຊ້, ຈາກນັ້ນ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີກໍ່ໄດ້ໃຫ້ກຽດໂອ້ລົມຕໍ່ພິທີ, ກ່ອນອື່ນ ທ່ານໄດ້ຍ້ອງຍໍຊົມເຊີຍຕໍ່ຜົນສຳເລັດດັ່ງກ່າວອັນເປັນສິ່ງສຳຄັນໃນການເປັນຂົວຕໍ່ໄປ-ມາຫາສູ່ກັນຂອງປະຊາຊົນເຂດດັ່ງກ່າວ, ທັງເປັນຄວາມສະດວກສະບາຍໃນການລຳລຽງສິນຄ້າ, ຂົນສົ່ງຜົນຜະຜິດກະສິກຳໄປສູ່ຕົວເມືອງໄດ້ວ່ອງໄວ, ທ່ານ ຍັງໄດ້ກ່າວຕື່ມອີກວ່າ: ເມືອມີຂົວຂ້າມແມ່ນໍ້າແລ້ວ ປະຊາຊົນທຸກຄົນຕ້ອງເປັນເຈົ້າການໃນການປົກປັກຮັກສາ ເພື່ອໃຫ້ນຳໃຊ້ໄດ້ຍາວນານ, ເອົາໃຈໃສ່ໃນການຜະລິດກະສິກໍາໃຫ້ຫຼາຍໃຫ້ກາຍເປັນສິນຄ້ານຳພາຄອບຄົວໃຫ້ຮັ່ງມີ ແລະ ຕ້ອງເອົາໃຈໃສ່ເປັນຫູເປັນຕາ ພ້ອມທັງຕ້ານ ແລະ ສະກັດກັ້ນປະກົດການຫຍໍ້ທໍ້ ເປັນຕົ້ນແມ່ນບັນຫາຢາເສບຕິດ, ໂອກາດດັ່ງກ່າວອຳນາດການປົກຄອງບ້ານກໍ່ໄດ້ບາສີໃຫ້ການນຳຂອງແຂວງ ແລະ ເມືອງທີ່ເຂົ້າຮ່ວມພິທີ, ທັງນີ້ກໍ່ເພື່ອເປັນການສະແດງຄວາມຮູ້ບຸນຄຸນຕໍ່ການນຳພັກ-ລັດ, ເວົ້າລວມ, ເວົ້າສິເພາະແມ່ນການນຳຂອງແຂວງ ແລະ ເມືອງ ໄຊຍະບູລີ ທີ່ຍາມໃດກໍ່ເປັນຫວ່ງເປັນໄຍຕໍ່ການດຳລົງຊີວິດຂອງປະຊາຊົນດ້ວຍດີຕະຫຼອດມາ.

ແຫຼ່ງຂ່າວ: ຫ້ອງວ່າການແຂວງ ໄຊຍະບູລີ

ໂດຍ: ອຸ່ນເຮືອນ ໂພທິລັກ

ໂທ: 22126933  

ແຜນທີ ແຂວງໄຊຍະບູລີ