ຈໍານວນຜູ້ເຂົ້າຊົມເວັບໄຊ

106928
ມື້ນີ້ມື້ນີ້24
ມື້ວານນີ້ມື້ວານນີ້249
ອາທິດນີ້ອາທິດນີ້1366
ເດືອນນີ້ເດືອນນີ້4604
ລວມທັງໝົດລວມທັງໝົດ106928

ມີ 47  ຂາສັນຈອນ ແລະ ບໍ່ມີສະມາຊິກອອນໄລນ໌ ອອນໄລນ໌

ເຂົ້າສູ່ລະບົບ

ພາຍຫຼັງທີ່ໄດ້ດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາປະຊາຊົນແຂວງ ໄຊຍະບູລີ ຊຸດທີ I ມາເປັນເວລາ 3 ວັນ ຈຶ່ງໄດ້ອັດລົງດ້ວຍຜົນສຳເລັດອັນຈົບງາມ ໃນຕອນບ່າຍຂອງວັນທີ 3 ສິງຫາ 2018ນີ້ ທີ່ສະໂມສອນ ໂຮງຮຽນການເມືອງ - ການປົກຄອງແຂວງ, ໂດຍການເປັນປະທານຂອງ ທ່ານ ປອ ສົມລິດ ເປືອກແກ້ວ ຮອງເລຂາພັກແຂວງ, ປະທານສະພາປະຊາຊົນແຂວງ; ເປັນກຽດເຂົ້າຮ່ວມມີ ທ່ານ ພົງສະຫວັນ ສິດທະວົງ ເລຂາພັກແຂວງ ເຈົ້າແຂວງ ໄຊຍະບູລີ; ມີບັນດາທ່ານຄະນະປະຈໍາພັກແຂວງ, ກໍາມະການພັກແຂວງ, ສະມາຊິກສະພາແຫ່ງຊາດເຂດເລືອກຕັ້ງທີ 7, ອາດີດການນໍາຂອງແຂວງ, ອາດີດສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ນັກປະຕິວັດອາວຸໂສ - ບໍານານ, ຜູ້ຊົງຄຸນວຸດທິ, ຕາງໜ້າອົງການຈັດຕັ້ງພັກ - ລັດ, ອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ, ນັກທຸລະກິດ ແລະ ຜູ້ປະກອບການ ຂົ້າຮ່ວມ.

 

ຕະຫຼອດໄລຍະການດຳເນີນກອງປະຊຸມເປັນເວລາ 3 ວັນ; ບັນດາທ່ານສະມາຊິກສະພາ ປະຊາຊົນ ແຂວງ ໄດ້ຍົກສູງຄວາມຮັບຜິດຊອບການເມືອງຂອງຕົນ ສຸມທຸກສະຕິປັນຍາເຂົ້າໃນການຄົ້ນຄວ້າ, ພິຈາລະນາ ແລະ ຕົກລົງຮັບຮອງເອົາບັນຫາສໍາຄັນຕ່າງໆຂອງແຂວງ ດ້ວຍຄວາມເປັນເອກະພາບສູງ,

ເຊັ່ນ: ການລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວກັບສະພາບການຈັດຕັ້ງປະຕິບັດ ແຜນພັດທະນາເສດຖະກິດ - ສັງຄົມ, ແຜນງົບປະມານແຫ່ງລັດ ຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງວຽກງານຈຸດສຸມ ປະຈໍາ 6 ເດືອນທ້າຍປີ 2018, ຮັບຟັງການປະກອບຄໍາເຫັນ ຂອງຕາງໜ້າຄະນະປະຈໍາສະພາ ປະຊາຊົນ ແຂວງ ຕໍ່ບົດລາຍງານໂດຍສັງເຂບ ຂອງທ່ານເຈົ້າແຂວງ; ຮັບຟັງການລາຍງານຂອງພະແນກແຜນການ ແລະ ການລົງທຶນ; ພະແນກການເງິນແຂວງ ກ່ຽວກັບການຈັດຕັ້ງປະຕິບັດມະຕິກອງປະຊຸມສະໄໝສາມັນ ເທື່ອທີ 4 ສະພາ ປະຊາຊົນ ແຂວງ ຊຸດທີ I, ຮັບຟັງການລາຍງານ ແລະ ຕອບຂໍ້ຊັກຖາມ ຂອງບັນດາພະແນກການ, ອົງການ, ກົມກອງ ທີ່ພົວພັນເຖິງກາບປະຕິບັດພາລະບົດບາດ, ສິດ - ໜ້າທີ່ ແລະ ຄວາມຮັບຜິດຊອບຂອງຕົນ ເປັນຕົ້ນແມ່ນ: ການຄຸ້ມຄອງລາຄາສິນຄ້າ, ສະບຽງອາຫານ ຢູ່ພາຍໃນແຂວງ, ການຈັດສັນ ແລະ ການແກ້ໄຂບັນຫາທີ່ດິນ, ການພັດທະນາຊົນນະບົດ ແລະ ລຶບລ້າງຄວາມທຸກຍາກ, ຜົນຂອງການຈັດຕັ້ງປະຕິບັດທິດນໍາ 3 ສ້າງ, ການຕິດຕາມ - ກວດກາໂຄງການກໍ່ສ້າງເສັ້ນທາງ ແລະ ຕ້ານເຈື່ອນ, ການເຜີຍແຜ່ ແລະ ການຈັດຕັ້ງປະຕິບັດບັນດານິຕິກໍາລຸ່ມກົດໝາຍ, ການຈັດຕັ້ງປະຕິບັດມາດຕະການ ແລະ ວິທີການແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນ: ບັນຫາຢາເສບຕິດ ແລະ ບັນຫາອຸປະຕິເຫດ, ຮັບຟັງບົດລາຍງານ ຂອງຄະນະປະຈໍາສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານສະພາປະຊາຊົນແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018. ພ້ອມທັງໄດ້ສຸມໃສ່ຄົ້ນຄວ້ານິຕິກໍາ 3 ສະບັບ ແລະ ສາມາດຮັບຮອງໄດ້ 2 ສະບັບ ຄື: ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ແລະການເກັບລາຍຮັບ, ການນໍາໃຊ້ກອງທຶນ ຂອງອົງການພັດທະນາ ແລະ ບໍລິຫານຕົວເມືອງໄຊຍະບູລີ ແລະ ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຈັດຕັ້ງ ແລະ ຄຸ້ມຄອງກອງທຶນພັດທະນາຂັ້ນບ້ານ; ຄົ້ນຄວ້າ ແລະ ຮັບຮອງເອົາ 2 ມະຕິກອງປະຊຸມ ຄື: ມະຕິກອງປະຊຸມ ສະພາປະຊາຊົນແຂວງ ວ່າດ້ວຍການຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດ - ສົງຄົມ, ແຜນງົບປະມານແຫ່ງລັດຂອງແຂວງ ປະຈໍາ 6 ເດືອນຕົ້ນປີ ແລະ ທິດທາງວຽກງານຈຸດສຸມ ປະຈໍາ 6 ເດືອນທ້າຍປີ 2018 ແລະ ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງຂົງເຂດຍຸຕິທໍາ ແລະ ປກຊ-ປກສ. ໃນໄລຍະດໍາເນີນກອງປະຊຸມ ໄດ້ຮັບຟັງຄໍາຄິດຄໍາເຫັນຫຼາຍບັນຫາ ເຫັນວ່າມີຄວາມສໍາຄັນຍິ່ງຈາກປະຊາຊົນ ຈໍານວນໜຶ່ງ ກໍໄດ້ມີສາຍດ່ວນເຂົ້າມາຫາກອງປະຊຸມເພື່ອໃຫ້ກອງປະຊຸມໄດ້ຄົ້ນຄວ້າ, ພິຈາລະນາຕາມຄວາມເປັນຈິງ ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ I ໄດ້ຮັບຜົນສໍາເລັດຢ່າງຈົບງາມ ໂດຍຮຽກຮ້ອງມາຍັງອົງການປົກຄອງທ້ອງຖິ່ນ, ອົງການແນວລາວສ້າງຊາດ, ອົງການຈັດຕັ້ງມະຫາຊົນທຸກຂັ້ນ, ບັນດາຂະແໜງການຕ່າງໆ ພາຍໃນແຂວງ, ທົ່ວກໍາລັງປະກອບອາວຸດ, ຕະຫຼອດຮອດພະນັກງານ-ລັດຖະກອນ ແລະ ປະຊາຊົນບັນດາເຜົ່າໃນທົ່ວແຂວງ, ນັກທຸລະກິດ, ຜູ້ປະກອບການ ຈົ່ງສາມັກຄີປຸ້ມລຸມກັນ, ປະກອບສ່ວນເຂົ້າໃນການປະຕິບັດສອງໜ້າທີ່ຍຸດທະສາດຄື: ປົກປັກຮັກສາ ແລະ ພັດທະນາປະເທດຊາດ ຕາມທິດຍືນຍົງສູ່ຈຸດໝາຍສັງຄົມນິຍົມຢ່າງໜັກແໜ້ນແລະ ເສີມຂະຫຍາຍມູນເຊື້ອອັນສະຫງ່າລາສີຂອງແຂວງ ປົກປັກຮັກສາ ແລະ ພັດທະນາແຂວງໄຊຍະບູລີ ດ້ວຍຄວາມຮັບຜິດຊອບສູງເຮັດໃຫ້ສັງຄົມມີຄວາມສະຫງົບ, ເສດຖະກິດໄດ້ຮັບການພັດທະນາຂຶ້ນຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນ ນັບມື້ດີຂຶ້ນເປັນກ້າວໆ.

ແຫຼ່ງຂ່າວ: ຫ້ອງວ່າການແຂວງໄຊຍະບູລີ

ໂດຍ: ອຸ່ນເຮືອນ ໂພທິລັກ

ໂທ: 22126933  

ແຜນທີ ແຂວງໄຊຍະບູລີ