ພິທີປະກາດເມືອງ ແກ່ນທ້າວ ແຂວງ ໄຊຍະບູລີ ເປັນເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ໄດ້ຈັດຂຶ້ນໃນຕອນເຊົ້າຂອງວັນທີ 12 ກໍລະກົດ 2022 ນີ້, ທີ່ເດິ່ນກິລາຂອງເມືອງດັ່ງກ່າວ, ເປັນກຽດເຂົ້າຮ່ວມມີ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ທ່ານ ບົວເງິນ ຊາພູວົງ ຫົວໜ້າຄະນະທີ່ປຶກສາວຽກງານຂົນຂວາຍປະຊາຊົນ ສູນກາງແນວລາວສ້າງຊາດ, ທ່ານ ຄໍາສີ ແພງສະຫວັນ ປະທານແນວລາວສ້າງຊາດແຂວງ, ມີພະນັກງານຫຼັກແຫຼ່ງຂອງເມືອງ, ພະນັກງານບໍານານ-ອາວຸໂສ, ປະທານແນວແຕ່ລະບ້ານ ແລະ ແຂກຮັບເຊິນຈາກສູນກາງ ແລະ ແຂວງເຂົ້າຮ່ວມ.
ໃນພິທີ ທ່ານ ອໍາຄາ ລັດສະໝີ ເຈົ້າເມືອງ ແກ່ນທ້າວ ໄດ້ລາຍງານກ່ຽວກັບການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ, ເຊິ່ງທ່ານໄດ້ກ່າວວ່າ: ການສ້າງຄອບຄົວ ແລະ ບ້ານສາມັກຄີປອງດອງແມ່ນການປຸກລະດົມກໍາລັງແຮງທົ່ວປວງຊົນໃຫ້ເຂົ້າຮ່ວມປະຕິບັດສອງໜ້າທີ່ຍຸດທະສາດໃຫ້ເປັນຂະບວນກວ້າງຂວາງ ແລະ ຟົດຟື້ນ, ມີຄວາມສາມັກຄີຢ່າງໜັກແໜ້ນ, ມີຄວາມເປັນເອກະພາບຂອງປະຊົນຊົນບັນດາເຜົ່າ, ຊັ້ນຄົນ, ສາດສະໜາ, ເພດ-ໄວ ໂດຍເລີ່ມຈາກຄອບຄົວ ແລະ ຮາກຖານບ້ານເຊິ່ງເປັນພື້ນຖານໃຫ້ແກ່ການສ້າງບ້ານພັດທະນາ, ອັນໄດ້ເຮັດໃຫ້ເມືອງ ແກ່ນທ້າວ ຮັບປະກັນໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ເຮັດໃຫ້ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ທົ່ວເມືອງມີເງິນກອງທຶນ 4 ກອງທຶນ, ມີສະມາຊິກ 745 ຄົນ, ມີທຶນ 2 ຕື້ກວ່າກີບ, ມີຄອບຄົວພັດທະນາ 8.257 ຄອບຄົວ, ເປັນບ້ານພັດທະນາແລ້ວ 34 ບ້ານ, ສໍາລັບຜົນການກວດກາປະເມີນການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ມີ 14 ບ້ານທີ່ຈັດຕັ້ງປະຕິບັດ ແລະ ໄດ້ປະກາດເປັນບ້ານສາມັກຄີປອງດອງແລ້ວ 100%, ຈໍານວນຄອບຄົວທີ່ໄດ້ກວດກາທັງໝົດ 8.107 ຄອບຄົວ ເທົ່າກັບ 93,47%, ໂດຍປະຕິບັດຕາມ 4 ມາດຖານຂອງຄອບຄົວສາມັກຄີປອງດອງຄື: ມາດຖານທີ1 ປະຕິບັດໄດ້ 95,27%, ມາດຖານ2 ປະຕິບັດໄດ້ 93,76%, ມາດຖານ3 ປະຕິບັດໄດ້ 94,31% ແລະ ມາດຖານ4 ປະຕິບັດໄດ້ 94,73% ແລະ 5 ມາດຖານຂອງບ້ານ: ມາດຖານທີ1 ປະຕິບັດໄດ້ 90,75%, ມາດຖານ2 ປະຕິບັດໄດ້ 90,15%, ມາດຖານ3 ປະຕິບັດໄດ້ 92,85%, ມາດຖານ4 ປະຕິບັດໄດ້ 93,15% ແລະ ມາດຖານ5 ປະຕິບັດໄດ້ 93,20%, ໃນພິທີໄດ້ມີການມອບໃບຢັ້ງຢືນເມືອງສາມັກຄີປອງດອງ, ໂດຍແມ່ນ ທ່ານພົງສະຫວັນ ສິດທະວົງ ເປັນຜູ້ມອບ ແລະ ຮັບໂດຍ ທ່ານອໍາຄາ ລັດສະໝີ ເຈົ້າເມືອງ ແກ່ນທ້າວ, ຈາກນັ້ນບັນດາຜູ້ເຂົ້າຮ່ວມກໍ່ໄດ້ຮ່ວມລັ່ນຄ້ອງ 9 ບາດ, ຕັດແຖບຜ້າ, ເປີດປ້າຍນາມມະຍົດເມືອງສາມັກຄີປອງດອງ ແລະ ໄດ້ຮ່ວມກັນປ່ອຍປາລົງຝາຍນໍ້າຕໍາ.
…………………………..
ຂ່າວ-ພາບ: ອຸ່ນເຮືອນ ໂພທິລັກ